hoffndlich vergeß is ned
summer wi winder binni
jedn dooch am bohhuf gschdandn
hob afm zuuch gward umma
siema mid verschlofne aung
hob dann mei hausaufgohm schnell
abgschriem vo an freind
der zuuch had gradderd der
filler had badzd zwischer buschndorf und fädd
iech hob im schdeh gschlofm odder di
madle scheene aung nohdrehd
hobbs an di hoär zuhng odder iech
hobbna mid dumme schbrich imbonierd
bin dann in fädd ausgschdieng und bin
in di schull neidabbd
denn brauereigruch in der südschdadd den
wäri mei lebdooch nimmer as der nosn verliern
und iech denk mier des is nu
goär ned sulang her
und drodzdem is des alles scho
su weid wech vo mier
hoffndlich vergess is ned däss
iech amol su woär
hoffndlich
mier ham di schofkubfkaddl im
reliunderrichd rauszuhng
und dann in bio do hammer su
du wi wemmer a jazzkabelln wärn
der harry had sax gschbilld und
iech in kondrabass
der beder klavier und der
jogi had in diesch als dromml umfunktionierd
iech denk an mick der haddmer
domols lässich di moni ausgschbannd
und doderfier hobnern iech bom fußboll ganz
lässich in di mohnggruhm gschossn
mein erschdn richdichn kuss hobbi vo der
moni mid verzä grichd
had a weng nach gnobblauch gschmeggd obber fier
miech woär des is heggsde af der weld
di moni nach gnobblauch und di
bedra had gschmeckd nach vollmilchschogglod
und ercherdwann häddiech der biggi des
bfefferminzbombomludschn abgwehnd
obber vurher hadds mi hockn lassn wall der
liebe godd des su will hads gsachd
heid binni froh drum obber
domols hads mi ganz schee fäddi gmachd
alle rechte wolfgang buck
Aus dem Album
Unkraud vergehd ned, released April 19, 1988